महाराष्ट्र दहावीचा निकाल जाहीर; राज्याचा निकाल ९२.०९ टक्के, कोकण विभाग पुन्हा अव्वल
पुणे : महाराष्ट्र राज्य माध्यमिक आणि उच्च माध्यमिक शिक्षण मंडळाकडून घेण्यात आलेल्या माध्यमिक शालान्त प्रमाणपत्र परीक्षा अर्थात दहावी परीक्षेचा निकाल आज जाहीर करण्यात आला. राज्यभरातील लाखो विद्यार्थी, पालक आणि शिक्षकांच्या उत्सुकतेला अखेर पूर्णविराम मिळाला असून यंदाही विद्यार्थ्यांनी उल्लेखनीय यशाची परंपरा कायम राखली आहे. यशाच्या सुवर्णक्षणांनी आज राज्याचे शैक्षणिक विश्व उजळून निघाले.
निकाल जाहीर करताना मंडळाच्या वतीने उपस्थित मान्यवरांचे स्वागत करण्यात आले. शालेय शिक्षण व क्रीडा विभागाचे प्रधान सचिव रणजितसिंह देओल, शिक्षण आयुक्त तसेच विविध विभागांतील वरिष्ठ अधिकारी या कार्यक्रमाला उपस्थित होते. फेब्रुवारी ते मार्च २०२६ या कालावधीत २० फेब्रुवारी ते १८ मार्चदरम्यान ही परीक्षा राज्यभर पार पडली.
यंदाची दहावीची परीक्षा पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत घेण्यात आली होती. राज्यातून एकूण १५ लाख ६० हजार १५४ विद्यार्थ्यांनी नोंदणी केली होती. त्यापैकी १५ लाख ४२ हजार ४७२ विद्यार्थी प्रत्यक्ष परीक्षेला बसले. यामधून तब्बल १४ लाख २० हजार ४८६ विद्यार्थी उत्तीर्ण झाले असून राज्याचा एकूण निकाल ९२.०९ टक्के इतका लागला आहे.
विभागनिहाय निकालामध्ये कोकण विभागाने पुन्हा एकदा आपले अव्वल स्थान कायम राखत ९७.२४ टक्के निकालाची दमदार नोंद केली. तर नाशिक विभागाचा निकाल ८८.१३ टक्के इतका लागला असून तो राज्यातील सर्वात कमी निकाल ठरला आहे.
