ओळख श्री ज्ञानेश्वरीची वार्षिक पारितोषिक वितरण सोहळा हरिनाम गजरात 

आळंदी ( अर्जुन मेदनकर ) : ओळख श्री ज्ञानेश्वरीची या उपक्रमा अंतर्गत घेण्यात आलेल्या वार्षिक परीक्षेत उत्तम कामगिरी करणाऱ्या विद्यार्थ्यांचा बक्षीस वितरण सोहळा मोठ्या उत्साहात हरिनाम गजरात साजरा करण्यात आला.

ओळख श्री ज्ञानेश्वरीची एक परिवार या अंतर्गत श्री ज्ञानेश्वर महाराज संस्थान कमेटी, श्री ज्ञानेश्वर महाराज चरित्र समिती, श्री ज्ञानेश्वर शिक्षण संस्था, पत्रकार संघ, अध्यापक महाराज यांचे माध्यमातून ओळख श्री ज्ञानेश्वरीची हा उपक्रम शालेय मुलांसाठी राबविला जातो. या उपक्रमाचे माध्यमातून घेण्यात आलेल्या वार्षिक परीक्षांच्या पारितोषिक वितरण समारंभाचे आयोजन खालुंब्रे येथील श्री समर्थ इंग्लिश स्कुल मध्ये मोठ्या उत्साहात आयोजन करण्यात आले होते. या प्रसंगी खालुंब्रे गावातील ज्येष्ठ सामाजिक कार्यकर्ते दत्तात्रय मामा बोत्रे, बाळासाहेब कारले, ओळख ज्ञानेश्वरी चे मार्गदर्शक शिक्षक जी. पी. पालवे, शिवसेना शाखा प्रमुख रोहिदास कदम, ओळख श्री ज्ञानेश्वरी परिवारातील घटक सदस्य, आवेकर भावे रामचंद्र संस्थान विश्वस्त अर्जुन मेदनकर, मुख्याध्यापिका वंदना यादव याचेसह सामाजिक, राजकीय व शैक्षणिक क्षेत्रातील मान्यवर उपस्थित होते.

अध्यक्षीय भाषणात दत्तात्रय मामा बोत्रे यांनी विद्यार्थ्यांना मार्गदर्शन करीत शालेय मुलासाठी ओळख श्री ज्ञानेश्वरीची हा उपक्रम मार्गदर्शक ठरत आहे. यामुळे सर्व शाळांनी हा उपक्रम स्वीकरण्याची गरज असल्याचे त्यांनी सांगितले. यावेळी अर्जुन मेदनकर यांनी संत साहित्यातून व्यक्तिमत्व विकास आणि भारताचे भावी नागरिक सुशिक्षित, सुसंस्कृत, संस्कारक्षम घडावेत यासाठी हा उपक्रम मुलांना उपयुक्त आणि प्रेरणादायी असल्याचे सांगितले. श्री ज्ञानेश्वर महाराज चरित्र समिती अध्यक्ष प्रकाश काळे यांच्या विशेष प्रयत्नात १०८ शाळांत उपक्रम पोहोचल्याचे त्यांनी सांगत संत साहित्य श्री ग्रंथराज ज्ञानेश्वरी हा जीवन ग्रंथ असून प्रत्येकाचे जीवनास कलाटणी देणारे साहित्य आहे. यात सर्व प्रश्नांची उत्तरे मिळत असल्याचे त्यांनी सांगितले.

या कार्यक्रमामुळे विद्यार्थ्यांमध्ये ज्ञानेश्वरी अभ्यासा विषयी नवीन उत्साह निर्माण झाला असून, गावातील पालक व नागरिकां कडून या उपक्रमाचे कौतुक करण्यात येत आहे. संस्थापक अध्यक्ष शिवाजीराव गवारे, सचिव विद्याताई गवारे यांचे मार्गदर्शक सूचना आणि प्रेरणेतून कार्यक्रम यशस्वी झाला. कार्यक्रमाचे सूत्रसंचलन शितल पवार यांनी केले.